Повеќето идни мајки едвај чекаат стомакот да почне да им се забележува, да го почувствуваат првото движење на бебето… Потоа како што расте бебето не само што чувствуваат како се движи, туку тоа може и да се види бидејќи стомакот понекогаш и буквално потскокнува, може да се почувствува кога бебето ика, да се претпостави кога спие… Сите идни мајки поголемиот дел од денот го поминуваат со раката на стомакот, чекајќи бебето да „јави“ од внатре.
За време на ултразвучните прегледи често се случува бебињата да бидат „фатени“ со палците в уста, додека зеваат… Но дали сте знаеле дека бебињата во стомакот почнуваат да вежбаат и плачење?
Ова звучи тажно особено затоа што секој родител сака неговото бебе да почувствува само радост и љубов, но се случува. Новото истражување спроведено на универзитетот Дурам и Ланкастер покажало дека бебињата почнуваат да ги вежбаат своите вештини на комуникација, кои подразбираат и плачење, уште додека се во стомакот на мама. Зошто е тоа важно? Затоа што значи дека штом ќе дојдат на свет така ќе можат да „кажат“ ако нешто им недостасува или им пречи.
Научниците користеле ултразвук и ги набљудувале бебињата, проучувајќи какви се изрази на лицето прават пред раѓањето. Се покажало дека прават и „комплексни изрази кои вклучуваат спуштање на веѓите и набирање на носот“.
Доктор Рајсланд од Дурам универзитетот вели дека за бебињата од животно значење е способноста веднаш по раѓањето да покажат ако нешто ги боли.
Сепак науката допрва треба да утврди дали тие плачливи изрази на лицата значат дека бебето нешто навистина го боли или само вежбаат за во иднина.
