Кај алергиската астма нападите се предизвикани од страна на разни алергени, а кај неалергиската се работи за разни неалергиски фактори: физички напор, вдишување на ладен и сув воздух, вирусни инфекции, силни емоции, загадување на воздух (најчесто чад од тутун).
Астмата е хронично воспаление на дишните патишта кое се карактеризира со различни повторувачки симптоми, реверзибилна опструкција и бронхоспазам. Сите видови на астма го следат истиот општ процес, a таа влијае на дишните патишта, кои се протегаат помеѓу носот и устата до белите дробови.
Постојат различни типови, вклучувајќи и некои за кои, веројатно, никогаш не сте слушнале.
Кашлицата – варијанта на астма
Луѓето често не сфаќаат дека кашлањето е знак за астма, но тоа е всушност еден од најчестите симптоми. Астматичарите обично имаат константна сува кашлица која често се влошува во текот на ноќта. Кашлицата е непродуктивна и е предизвикана од различни алергени, вежбање, стрес, настинка или грип. Ако имате упорна кашлица, која трае повеќе од осум недели, одете на лекар.
Аспиринска астма (AERD)
Оваа хронична медицинска состојба предизвикува астма, повторувачки назални полипи и чувствителност на аспирин и други нестероидни антиинфламаторни лекови (НСАИЛ). Луѓето со оваа астма обично имаат класични симптоми на астма, како што се кашлање, отежнато дишење и стегање во градите.
Исто така, може да имаат зголемена назална конгестија, главоболка или синусна болка, кивање, осип, абдоминална болка и повраќање.
Оваа астма обично се развива одеднаш на возраст од 20 до 50 години.
Астма предизвикана од вежбање
Можно е да имате „обична“ астма и како резултат на тоа да се јават проблеми со дишењето за време на вежбањето. Но, исто така, е можно да се јават симптоми на астма само додека вежбате. Оваа состојба е позната како бронхоконстрикција предизвикана од вежбање.
Оние што страдаат од астма предизвикана од вежбање обично имаат симптоми како што се кашлање, тешкотии при дишењето, стегање на градниот кош или болка. Симптомите може да продолжат и откако ќе престанете да вежбате. Ако се сомневате дека бронхоконстрикција предизвикана од напор стои зад вашиот напорен тренинг, посетете го вашиот лекар.
Професионална астма
Професионална астма е реверзибилно стеснување на дишните патишта предизвикано од вдишување на честички или гасови на работното место Оваа астма може да предизвика стегање во градите, отежнато дишење, кашлање, кивање, течење на носот и насолзени очи. Секој може да развие професионална астма, а најизложени на ризик се:
- Пекари;
- Производители на детергенти;
- Производители на лекови;
- Земјоделци;
- Градежни работници;
- Лабораториски работници;
- Оние кои работат со метал;
- Столари.
Лекувањето е исто како и за другите видови на астма (лекови кои ги отвораат дишните патишта (бронходилататори), кои може да се даваат преку инхалација или таблети.
Емоционална астма
Технички, ова не е тип на астма – повеќе станува збор за тоа како силните емоции можат да предизвикаат астма. Во некои случаи, физичките манифестации на силни чувства како врескање, плачење или смеење може да предизвикаат астма. Ако забележите дека нешто се случува со вашите дишни патишта, посетете лекар, пишува „self.com“.
