Иако научните истражувања предупредуваат за штетноста од солариумот, многу жени, но и мажи се редовни на сончање во капсула. Целта е да се задржи потемнетиот тен преку цела година.
Повеќето зависници од потемен тен, солариум посетуваат три до четири пати неделно. Дерматолозите ова го нарекуваат зависност. Постојат луѓе кои мислат дека никогаш не се доволно исончани и таквите, лекарите ги споредуваат со анорексичните лица кои секогаш мислат дека се предебели. Повеќето од нив се мажи и жени на возраст под 40 години, кои прекумерно одат во солариум, бидејќи сакаат чоколадна боја на кожата.
Салоните за сончање или солариумите за прв пат се појавиле во Америка во осумдесеттите години и таму веќе десетина години наназад се зборува за оваа нова зависност – таканаречена тенорексија.
Симптомите се слични како и кај зависноста од хероин, тврди професор Џоел Хилхаус од факултетот за јавно здравје во Тенеси. Зависниците имаат силна желба за исончан и потемен тен, потреба за се поголеми дози, чувство на непријатност кога не се „сончаат„, еуфорија кога тоа го прават и се нервираат кога пријателите или семејството ќе им забележат дека претерале.
Светската здравствена организација од 2012 година уредите за вештачко сончање ги класификува како канцерогени. Прва држава која го забрани солариумот е Бразил уште во 2009 година, а пет години подоцна, истото го направи и Австралија, земја која има најголем број на меланоми по глава на жители во светот. За оваа зависност нема посебна терапија. Се советува основање на групи за поддршка, како анонимните алкохоличари.
