Аспарагусот претставува зеленчук богат со најразлични нутритиенти, а истовремено е сиромашен со калории. Во 100 г варен аспарагус има само 22 калории – 2,4 г протеини и 4,1 г јаглехидрати (од тоа 2 грама влакна) и само 0,2 г масти. Ова количество содржи 1006 IU витамин А, 150 мкг фолна киселина и 224 мг калиум. Аспарагусот, исто така, претставува добар извор на витамин К (50 мкг во 100 г), а содржи и помало количество витамини Б1, Б2 и Б3, селен, цинк и железо.
Овој зеленчук содржи и антиоксиданти како што се витаминот Е, витаминот Ц, глутатион, кверцетин и кемпферол. Споменатите антиоксиданти делуваат антиинфламаторно и помагаат во превенцијата од воспаленија, кардиоваскуларни заболувања и карциноми. Кога станува збор за глутатионот овој антиоксидант му помага на телото да се ослободи од токсините, додека истовремено ја зголемува енергијата и го зајакнува имунитетот. Освен аспарагусот меѓу најдобрите извори на глутатион спаѓаат карфиолот, брокулите, прокељот, зелката, кромидот, цвеклото, спанаќот и магдоносот.
