Откако е откриен омикрон во ноември, научниците забрзано настојуваат да откријат дали предизвикува полесни симптоми на болеста и зошто се чини позаразна од делта.
Постојат различни причини поради кои вирусот би можел полесно да се пренесува. На пример, колку долго останува да лебди во воздухот, колку е способен да се зафати за клетките и колку добро го избегнува имуниот систем на домаќинот.
Истражување предводено од научници од Универзитетот во Копенхаген, главната статистика на Данска и серолошкиот Институт Staten Serum Institute (SSI) укажува на тоа дека главната причина за побрзото ширење на оваа варијанта на вирусот е неговата способност да го избегне имунитетот добиен преку вакцината.
“Нашите откритија потврдуваат дека брзото ширење на омикрон може да се припише на способноста да го заобиколи имунитетот, а не на инхерентното зголемување на преносливоста“, тврдат истражувачите.
Данските научници претходно заклучија дека помеѓу вакцинираната популација, омикрон е помеѓу 2,7 и 3,7 пати позаразен од делта.
Со истражувањето исто така е откриено дека, независно за која варијанта на вирусот се работи, помала е веројатноста дека оние вакцинираните со трета доза ќе гопренесат вирусот, отколку невакцинираните.
Иако полесно се пренесува, омикрон предизвикува поблага форма на болеста, изјави Тајра Гроув Краузе, технички директор на SSI.
Таа додава дека ризикот од хоспитализација поради омикрон е за половина помал отколку кога станува збор за делта, но поради поголемиот број заразени, здравствените системи се уште се под притисок.
