Во ек на настинки и грип, идеално време е да се свртиме кон природата, која во својата раскош нуди и многу билки од кои се подготвуваат разни чаеви кои се во служба на здравјето.
Пред да посегнете по лекови, подобрете ја својата здравствена состојба со чаеви. Секако, тие не можат да ги излечат болестите, но можат и тоа како да ублажат или превенираат одредени здравствени проблеми.
Чаеви кои се препорачуваат за студените зимски денови се чај од цвет од бозел, листови од нане, корени на ехинацеа… Всушност, што и да подготвите нема да погрешите, а најголема корист од свежо приготвената шолја чај ќе има вашиот организам. На здравје!
- За прочистување на црниот дроб: Невен (Calendula officinalis)
Чајот од невен се приготвува така што една полна лажица невен се прелива со една шолја врела вода, а се пие 3-4 пати дневно.
Чајот од невен се применува и кај заразната жолтица и заболувањата на црниот дроб и жолчната кеса, делува и како благ седатив, па често се применува за смирување, при несоница, нервоза и психичка напнатост.
Невенот ги релаксира мазните мускули околу крвните садови, па затоа често се користи при тахикардија, ангина пекторис и други срцеви заболувања.
За зајакнување на имунитетот: Ехинацеа (Ehinacea)
Подготовка: Лажичка од суви листови, цветови или стебленце од билката се прелива со два децилитра врела вода и се остава да отстои половина час. Пијте три пати до две децилитри незасладен чај секој ден
- Го ублажува стресот: Маточина (Melissa officinalis)
Подготовка: Попарете со врела вода три лажички листови од маточина. Оставете да остојат околу десет минути, па процедете. Пијте три чаши чај на ден во период од шест недели.
- За искашлување: Бел слез (Althaea officinalis)
Подготовка: Прелијте со млака вода една лажичка сушен корен од бел слез, оставете да постои половина час, процедете и засладете по желба со мед.
- Против настинка: Шипка (Rosa corymbifera, Rosa canina)
Подготовка: Две лажички од суви шипки се преливаат со една шолја врела вода. Се остава околу 15 минути да отстои, а потоа се процедува и се додава мед и сок од лимон по желба. Може да се пие без ограничување.
- Против грип: Бозел (Sambucus nigra)
Подготовка: Лажичка од сушен цвет на бозел се прелива со една шолја врела вода. Се остава да постои околу 10-15 минути, а потоа се процедува. Може да се пие преку целиот ден, а добар е и против треска, бидејќи предизвикува потење, а со тоа ја намалува температурата.
- Чај за асматичари: Питом костен (Castanea sativa)
Подготовка: Лажичка од сушен исечкан питом костен се прелива со една шолја ладна вода. Потоа се проврива и се остава да отстои околу 3 до 5 минути, а потоа се процедува. Пијте две до три чаши од чајот на ден или правете гаргара.
- Помага при ХОББ: Смрека (Juniperus communis)
Подготовка: Лажичка од добро изгмечени плодови од смрека се попаруваат со врела вода, се покриваат и се оставаат да отстојат околу 5 до 10 минути, а потоа се процедуваат. Може да се пие засладен до две шолји во тек на денот. Овој чај не се препорачува за лица со бубрежни проблеми.
- Против дијареја: Мајоран (Origanum majorana)
Подготовка: Прелијте лажичка мајоран со чаша врела вода и процедете по три минути. Пијте по потреба. Секојдневна употреба на чајот не се препорачува поради можна појава на главоболки.
