Остеоартритисот е болест која се развива бавно, но истражувања потврдиле дека кај некои пациенти состојбата имала далеку побрз тек. Брзината на развојот на остеоартритисот се поврзува со дебелината, која директно влијае на пропаѓањето на рскавицата.
Истражувањето кое го потврдува овој факт вклучувало над 300 пациенти на кои им е дијагностициран остеоартритис. Сите имале проблем со прекумерна тежина, но немале уништена рскавица. Истражувањето докажува дека, со текот на времето, во рок од 30 месеци, кај 20 отсто од пациентите се јавува пропаѓање на рскавицата, а кај пет отсто од нив тоа се случувало многу брзо. Според резултатите, секој килограм вишок допринел за забрзување на пропаѓањето на рскавицата за 11 отсто.
Во моментов не постои посебна програма за лечење на остеоартритисот, освен терапијата против болка или потполна замена на зглобот. Сепак, истражувањето докажува дека дел од борбата против болеста може да биде и намалувањето на телесната тежина.
Остеоартритисот е една од најчестите мускулно-скелетни тегоби, а најчесто ги погодува повозрасните. Заради тоа е особено важно и во овие години да се одржува телесната тежина во нормални граници и да се консумира здрава храна, препорачуваат лекарите.
