Според истражувањето објавено во списанието CA: A Cancer Journal for Clinicians, до 2012 година прекумерната телесна тежина била одговорна за 544.300 случаи на карцином во светот.
Додека лицата со прекумерната дебелина придонесувале за само еден процент од карциномите во светот во неразвиените земји, тие биле осум проценти од заболените со карцином во некои високо развиени земји.
“Многу луѓе не знаат за врската помеѓу телесната тежина и карциномот. Настојувањето да се постигне здрава телесна тежина и таа да се одржува е многу важно и може да го намали ризикот од појава на карцином“, истакнува водачот на студијата Хуна Сунг од Американското здружение за борба против ракот.
Бројот на лица кои се прекумерно дебели расте во светот од 1970 година, наведуваат научниците. Според податоците собрани до 2016 година, 40% од возрасните и 18% од училишните деца се предебели, што претставува две милијарди возрани и 340 милиони деца ширум светот.
Додека уделот на дебело население нагло пораснал во повеќето земји, скокот е најизразен во некои сиромашни и средно развиени земји кои го прифатиле западниот стил на живот со премала физичка активност и премногу нездрава храна, наведуваат авторите на истражувањето.
“Симултаниот раст на прекумерната телесна тежина речиси во сите земји, се верува дека е поттикнат сво голем дел со промените на глобалниот прехранбен систем кој промовира храна богата со калории, а сиромашна со хранливи состојки, со намалување на можноста за физичка активност“, вели Сунг.
Дебелината дефинитивно е поврзана со зголемен ризик за 13 видови на карцином што ги погаѓа дојките, дебелото црево и ректумот, матката, хранопроводот, золчката, бубрезите, црниот дроб, јајчниците, желудникот, штитната жлезда, мозокот, ‘рбетниот мозок и крвните клетки.
Националното богатство е најочигледен системски тригер за дебелината на населението, наведуваат авторите на истражувањето.
Економската транзиција кон богатите економии ја следи окружување кое поттикнува дебелина – со секои 10.000 амеркански долари пораст на националниот приход по глава на жител, оди и зголемување на индексот на телесна маса кај возрасните од 0,4%, наведуваат авторите.
Според стручњаците, резулатите од ова истражување даваат нови докази за потребата за донесување политички одлуки кои промовираат здрави прехранбени навики и вежбање како пат за борба против дебелината и намалување на глобалниот товар што го носат карциномите.
Промените во исхраната може да вклучуваат донесување на законска регулатива за исфрлање на транс мастите од прехранбениот синџир, намалување на шеќерот со воведување на данок на засладените пијалаци, поттик за зголемен внес на овошје и зеленчук и ограничување на големината на порциите и пакувањето на храната, со цел намалување на внесот на калории, а со тоа и ризикот за прекумерна тежина.
