Во последните 25 години, во неколку развиени земји, бројот на пациенти со рак на црниот дроб е двојно зголемен поради континуираната епидемија на дебелина и зголемување на бројот на пациенти со хепатитис, покажала новата студија.
Во четири земји: САД, Велика Британија, Австралија и Канада – ракот на црниот дроб е единствениот голем рак во кој бројот на смртни случаи се зголемува од година во година. Затоа е исклучително битно да се направат напори да се спречи развојот на ракот на црниот дроб, или ако веќе се развил, да се открие во рана фаза на болеста.
Дебелината предизвикува неалкохолен масен црн дроб, кој може да доведе до развој на рак на црниот дроб
Околу 20 проценти од луѓето во развиените земји имаат одреден степен на неалкохолен масен црн дроб. Од нив, кај 1 од 10 лица може да се развие цироза на црниот дроб, а кај 20 до 30 проценти од пациентите со цироза се развива рак на црниот дроб. Што значи дека самата дебелина може да доведе до огромен број на случаи на рак на црниот дроб, бидејќи бројот на дебели лица се зголемува од година во година.
Што се однесува до хепатитисот, хепатитис Б и хепатитис Ц се вирусни заболувања кои предизвикуваат воспаление на црниот дроб. Без лекување, воспалението на црниот дроб може да напредува до цироза на црниот дроб и рак на црниот дроб. Многу луѓе со хепатитис Б и Ц не се свесни дека се инфицирани, а до моментот на дијагнозата, ракот на црниот дроб веќе може да се развие.
Новите антивирусни лекови помагаат во лекувањето на 95 проценти од пациентите со хепатитис Ц. Ваквите високо ефективни лекови не се достапни за лекување на хепатитис Б, но во повеќето случаи постојат лекови кои можат да ја контролираат инфекцијата и да го спречат развојот на рак на црниот дроб, било истакнато на Глобалниот самит за хепатитис, кој заврши во неделата во Торонто, Канада.
