Дебелината е почест причинител на рак од што било друго, велат од Организацијата за истражување на рак на Велика Британија. Токму затоа оттаму предупредуваат дека треба да се преземат итни мерки за да се намали бројот на луѓе со прекумерна тежина и со самото тоа да се намали ризикот од рак. Дебелината е причина за 13 различни видови рак и го надминува пушењето како водечка причина за четири вида рак, односно шансите да се добие рак на дебело црево, бурбрези, јајници и црн дроб се поголеми ако имате прекумерна телесна тежина отколку ако сте пушач.
Од организацијата велат дека статистиката покажува дека околу 22 800 од случаите на заболени од рак се предизвикани од прекумерна тежина, додека, пак, 54 300 случаи предизвикани од пушење. Од вкупно 42 000 нови случаи, дебелината е причина за рак на дебелото црево кај 4 800 пациенти, а пушењето за 2 900; од 12 900 нови случаи на заболени од рак на бубрезите, 2 900 биле предизвикани од дебелина, додека 1 600 од пушење; од 5 900 случаи на рак на црниот дроб 1 300 биле последица на дебелина, а 1 200 на пушење; а од 7 500 случаи на заболени од рак на јајници 490 биле дијагностицирани како последица на дебелина, додека само 25 поради пушење.
Но, за жал, и покрај сите предупредувања бројот на пушачи се намалува, а бројот на дебели луѓе значително расте. Експертите за здравство велат дека ситуацијата е загрижувачка.
