Познато е дека децата кои рано влегуваат во пубертет, се соочуваат со зголемен ризик од развој на мултиплекс склероза во возрасниот период. Сега, ново истражување, покажало дека всушност вишокот килограми кај овие деца се одговорни за зголемувањето на ризикот од појавата на оваа сериозна болест.
Она што се чини за главен покренувач не е возраста на пубертетот, туку телесната тежина на поединци во текот на целиот живот, истакнуваат стручњаците. Инаку, претходните студии укажувале на раниот пубертет како ризик фактор за мултиплекс склероза, особено кај жените.
Мултиплекс склерозата е автоимуно пореметување во кое имуниот систем почнува да ги напаѓа нервните влакна во мозокот и ‘рбетот, попречувајќи ја комуникацијата помеѓу мозокот и телото.
Постојат неколку претпоставки на кој начин вишокот килограми би можеле да го зголемат ризикот од мултиплекс склероза. Имено, лицата кои имаат вишок телесни масти исто така имаат пониско ниво на витамин Д во циркулацијата, што е поврзано со оваа болест. Истовремено, дополнителните масти го зголемуваат воспалението во телото, што може да поттикне развој на автоимуни болести, како што е мултиплекс склерозата.
