Ако барате начин како да превенирате настинка или грип, првиот чекор може да биде одење до продавница по свежи намриници.
ЦИТРУСНО ОВОШЈЕ
Витамин Ц секогаш пиеме кога ќе се разболиме, но важно е да го користиме и како превенција бидејќи докажано го штити имуниот систем со поттикнување на производството на бели крвни зрнца кои се клучен елемент во борбата против инфекциите. Грејпфрут, портокали, мандарини, лимони и зелен лимон се одличен извор на овој витамин. Бидејќи телото не го произведува, ниту го складира овој витамин, треба да се внесува преку храната.
ЦРВЕНИ ПИПЕРКИ
Витаминот Ц е главната ѕвезда на црвената пиперка и содржи до три пати повеќе од некои видови портокали, а познат е како поддржувач на силен имун систем. Не може да ја победи болеста, но студии покажуваат дека може да ја ублажи состојбата, па така научниците ја поддржуваат препораката дека треба да се зема околу 200 мг на ден како превенција од инфекции. Една црвена пиперка со средна големина содржи околу 150 мг од овој витамин. Содржи многу лековити, хранливи и општо корисни состојки за организмот и тоа: бета каротен, витамини А, Б1, Б2, Б6, Е и Ц, железо, глукоза, етерични масла, калиум, натриум, јаглехидрати, фолна киселина, фосфор, фруктоза и други.
БРОКУЛА
Брокулата изобилува со витамин Ц, но и антиоксиданти кои можат да учествуваат во спречување на разни болести, како што се рак, дијабетес тип 2, срцеви заболувања, инфекции и депресија. Едно истражување докажало дека нашиот организам многу подобро ги апсорбира состојките на брокулата кога се јаде сурова, а друга студија советува дека со термичката обработка го губи витаминот Ц. Готвењето на пареа ќе има најмал ефект врз содржината, па ако воопшто не сакате сурова брокула, пробајте го овој метод.
ЛУК
Експертите се согласуваат дека луѓето кои јадат лук, многу поретко ќе се настинати во студените зимски месеци, а доколку се разболат, многу побрзо ќе закрепнат. Нови студии потврдуваат дека лукот помага во зајакнување на имуниот систем. Сигурно е многу подобро да користите свеж лук отколку лук во прав, па додадете го во јадења и салати.
ЃУМБИР
Уште една намирница која често ја користиме кога сме болни, а може да помогне при смирување воспаленија, болки во грлото, но и мачнини. Освен што ќе го зајакне имуниот систем, а и ќе го загрее телото, може да ја намали и покачената телесна температура, бидејќи ќе го поттикне организмот да се поти, што пак го стимулира имуниот систем полесно да се бори со разни воспаленија и вируси.
СПАНАЌ
Содржи фолати, витамин А, витамин Ц, магнезиум и железо, така што може да го зајакне целиот имун систем и да му даде на телото доволно хранливи материи за обновување на ДНК. Искористете сите својства, така што ќе го јадете свеж или малку обарен.
