Во светот на повеќе од седум милиони луѓе им е дијагностицирана Паркинсонова болест, прогресивно нарушување на централниот нервен систем, покажуваат податоците од фондацијата „National Parkinson“.
Главните симптоми на болеста во 1817 година биле опишани од страна на Џејмс Паркинсон. Паркинсоновата болест е хронична невродегенеративна болест што настанува како последица на недостиг на невротрансмитерот допамин во делот на мозокот одговорен за координирани движења.
Светскиот ден на Паркинсоновата болест се одбележува на 11 април, а целта е да се подигне свеста за болеста
Станува збор за прогресивна дегенеративна состојба, која генерално се карактеризира со треперење на рацете и нозете, бавно движење, вкочанетост и абнормалности во држењето на телото. Во својата најсериозна форма, поврзана е со длабоки физички и ментални нарушувања.
Исто така, симптомите вклучуваат и депресија, нарушувања во спиењето, констипација, деменција и други.
Паркинсоновата болест е почеста кај луѓето постари од 50 години. Ги погодува и мажите и жените, со тоа што поголем број на мажи се разболуваат.
Симптомите на болеста може да варираат од личност до личност. Кај некои пациенти, може првично да бидат помалку изразени, а потоа да станат поинтензивни со текот на годините
Постојат многу теории кои се обидуваат да ја објаснат причината за појава на Паркинсонова болест. Многубројните истражувања упатуваат на влијанието на животната средина и генетските фактори врз развојот и почетокот на Паркинсонова болест, но досега не е идентификувана ниту една специфична причина.
Американската фондација „Паркинсонс“ укажува на тоа дека симптомите на болеста може да варираат од личност до личност. Кај некои пациенти, симптомите може првично да бидат помалку изразени, а потоа да станат поинтензивни со текот на годините.
Стандардна терапија на лекување не постои. Лекувањето на Паркинсонова болест не води кон запирање на болеста, туку само до контролирање на симптомите, а целта на лекувањето е симулирање на излачување на допамин. Важно е да се дијагностицира болеста рано за да се дефинира конкретна терапија.
Меѓу јавните личности дијагностицирани со Паркинсонова болест се актерот Мајкл Џ. Фокс, боксерот Мухамед Али и папата Јован Павле Втори, кој почина во 2005 година, а чија болест беше строго чувана тајна на Ватикан.
