Жените кои ја бричат или депилираат интимната зона се изложени на поголем ризик од долгорочна болка во гениталиите, тврдат научниците. Исто така, носењето тесни фармерки го зголемува ризикот од вулводинија, долгорочна и необјаснива болка во вулвата т.е. надворешните делови на гениталиите. Стручњаците предупредуваат дека мазната интимна зона, што е во тренд, ја остава кожата поизложена на триење, што може да доведе до некои компликации. А носењето тесна облека жените ги остава поподложни на инфекции како габи или бактериска вагиноза, што се поврзува со болната состојба вулводинија.
Научниците од Универзитетот во Бостон анализирале 434 жени на возраст меѓу 18 и 40 години. Околу половина од нив пателе од болка во гениталиите, а сите одговарале на прашања за облеката и навиките за „средување“ на интимната зона.
Жените кои во целост ги отстрануваат влакненцата „таму долу“ се изложени на 64 отсто поголем ризик од вулводинија, отколку оние кои само ги скратуваат влакненцата. Носењето тесни фармерки или панталони четири или повеќе дена неделно само го удвојува ризикот од оваа болна состојба, предупредуваат научниците.
„Отстранувањето на влакната од интимната зона, особено меѓу адолесцентките, е се попопуларно, а со тоа доаѓа до микроабразија на овој чувствителен дел од кожата, заради што младите жени се изложени на имуно-инфламаторни компликации“, вели истражувачот, доктор Бернар Харлоу.
Микроабразиите, инаку, се мали „пукнатини“ на кожата кои настануваат при отстранување на влакненцата – со бричење или депилирање – или триење.
„Носењето тесни фармерки или панталони создава услови кои се идеални за инфекции на гениталниот тракт, што има врска со болката во вулвата“, објаснува д-р Харлоу.
Вулводинијата е болка во или околу вулвата, која најчесто не е предизвикана од нешто видливо или очигледно. Болката може да се јави како печење или боцкање, а обично се засилува за време на допир или седење. Причината не е сосема позната, но стручњаците веруваат дека состојбата се јавува како резултат на оштетување на нервите при операција, породување или при вклештени нерви. Научниците истакнуваат и дека честите габични инфекции можат да бидат причина за оваа болна состојба.
