Постојат многу причини зошто некој може да биде депресивен во лето. Депресијата се јавува и во најсончевите месеци кај некои луѓе, кога може да им биде особено тешко да гледаат како се околу нив е во летна еуфорија.
Сезонското афектно пореметување најчесто се врзува со зимата и е попознато како „зимска депресија“. Се случува во согласност со промените на времето, бидејќи некои луѓе не можат нормално да функционираат без дневна светлина во зимските денови. Сепак, ова нарушување може да се појави и во текот на летото, во месеците што се сметаат за најопуштени и највесели во годината. Додека овие нарушувања се поврзани со временските промени, постојат уште многу причини за депресија што можат да се појават во кое било време од годината. Кај некои луѓе кои веќе страдаат од депресија може да се активираат нови епизоди.
Како депресивните луѓе го доживуваат летото?
Особено им е тешко да „дишат“ со полни бели дробови, па избегнуваат дружење и активности, чиј број само расте во текот на летото. Социјалните мрежи се преплавени со слики на луѓе кои се забавуваат под сончевите зраци, во што е тешко да се учествува кога се страда од депресија.
Симптомите кои се јавуваат кај зимската депресија (промени во исхраната, спиењето и избегнување на излегувања од дома) се јавуваат и кај лицата кои страдаат од депресија во текот на летото.
Може да се јави и губење на апетит и сонот, што предизвикува летаргија и болест. Кај некои луѓе може да се активира поради чувството на несигурност во сопственото тело, бидејќи се носи помалку облека и се минува доста време на плажите
Изолацијата е, исто така, честа, бидејќи се избегнува секаков вид на дружење. Повеќето луѓе се надвор на улиците, што може да предизвика анксиозност кај некои лица.
Прва помош: Во кругот на семејството и пријателите
Помислата да се обрати на блиска личност поради својата ментална состојба може да звучи страшно за депресивната личност, но мали чекори како овој може да помогнат. На тој начин, вашите најблиски пријатели ќе знаат кога и како да ви помогнат во случај на депресивни епизоди или да ги елиминираат нивните предизвикувачи.
Не е лошо да се ограничи времето поминато во сурфање на социјалните мрежи. Без оглед дали ја прикажуваат реалната ситуација на сликите или тенденција да се претстави својата најдобра (и нереална) верзија, ваквите објави може да ја засилат епизодата кај депресивните лица
Исто така, препорачливо е да се воведе во рутината и некоја едноставна активност, како што е вечерна прошетка или кафе пауза во омиленото кафе.
Сите активности треба да бидат во одреден распоред кој нема да го наруши биоритмот, кој, исто така, може да биде предизвикувач на депресивни епизоди. Исто така, треба да го организирате вашето време за јадење и спиењето во приближно исто време секој ден.
Се разбира, психотерапијата е од голема помош – така се доаѓа до професионални совети кои ќе ви помогнат да се справите со депресијата и соодветни индивидуални терапии.
Не е воопшто лесно – депресијата е и понатаму табу тема. Затоа, важно е да побарате помош кога ќе се појави депресија и така да ја зголемите свеста за оваа болест – тоа не значи дека нешто не е во ред со оној кој ја има, само треба да му се помогне како и на секој друг.
