Дерматофитија е габична болест на кожата која ја предизвикуваат дерматофити, микроорганизми поделени во три рода, Trichophyton, Microsporum и Epidermophyton. Дерматофитите можат да бидат од антропофилно потекло, зоофилно потекло или од геофилно потекло. Особено ги напаѓаат влакната и ноктите, но не предизвикуваат системски инфекции.
Во зависност од месстото каде настанала и од каде се шири, дерматофитијата може да се појави на повеќе делови од телото:
- На лицето: се појавува црвенило, свраб, лупење и пецкање на кожата, особено при изложување на сонце
- На брадата и мустаќите кај мажите: кожата е воспалена и зацрвенета, а се појавуваат и меурчиња со гној. Во овие случаи мора да се искорнат од корен влакната со дерматофити од брадата и мустаќите за да се уништат микроорганизмите
- На главата: дерматофитите се појавуваат на кожата на главата, најчесто околу коренот на влакната. Кожата во околината е црвена и чеша, а влакната се суви и лесно се кршат. Кај децата може габичките да напредуваат до тој степен и да предизвикаат трајно губење на косата
- Дланките и стопалата: овој вид на дерматофитија е најчеста кај помладите кои се занимаваат со спорт, особено водени спортови на базени или работат физичка работа и се постојано во затворени чевли. Главните симптоми се црвенило и свраб, а ширењето на дерматофитите предизвикува и непријатен мирис на нозете
Дерматофитијата лесно се препознава и се открива, а лекувањето зависи од местото каде што се појавува болеста.
