На алергиски реакции на убоди од разни инсекти се посклони оние лица кои и вообичаено имаат склоност кон алергии. Но, и лица кои дотогаш немале потешки алергиски случувања може бурно да реагираат. Одредени лица наведуваат дека секоја година се почувствителни на убоди, па прашањето е дали одредени инсекти се се поотровни.
Доколку се јават знаци на алергиска реакција на убод од оса во форма на осип и црвенило по целото тело, проследена со вртоглавица, мачнина, главоболка, потребна е итна лекарска помош.
АНАФИЛАКТИЧЕН ШОК
За да се намали можноста за анафилактичен шок кај лицата алергични на убод од пчела или оса, се препорачува да имаат автоинјектор кој содржи адреналин (пациентот тоа си го дава сам веднаш по убодот), како и лекови – антихистамници и кортикостероиди кои треба да ги прими веднаш по убодот, но и веднаш да се јави кај лекар.
Кој мора да биде посебно внимателен?
Секако дека е потребно посебно внимание од страна на лица кои и на најмал убод реагираат со изразено црвенило и оток на кожата. Алергиската реакција на човечкото тело кога ќе дојде во допир со гасеница најчесто се манифестира во форма на црвенило, осип и чешање, а во потешки случаи може да дојде и до оток на гласните жици и ресичката во усната шуплина.
По убодот од инсект на кожата најчесто се јавува интензивно црвенило и чешање на кожата на која се појавуваат ситни меурчиња. Кај таквите промени многу е важно кожата да се измие и да се намачка со противвоспалителна крема, а ако се јави отекување на кожата, силен јадеж на целото тело, засипнатост и отежнато дишење, секако потребно е шро побрзо да се побара лекарска помош.
Како се разликуваат симптомите и како да се препознаат?
Симптомите може да бидат благи – на местото на убодот се јавува мало црвено подрачје кое поминува за едн или два дена. Кај почувствителните лица, заедно со црвената точка на кожата, се појавува и околно црвенило кое може да биде со ширина од неколку милиметри, но отокот може да стане тврд и да не поминува.
Покрај тоа, како влошување на симптомите може да се појави чешање на кожата на целото тело и тоа без видлив осип. При понатамошно влошување доаѓа до отекување на усните, засипнатост што е знак дека лицето мора итно да се јави на лекар.
