Голем дел од родителите креваат веднаш паника кога нивното бебе ќе кивне или шмркне и во истиот момент го носат на доктор. Од друга страна, некои родители учат и знаат како да се носат со здравствените проблеми на детето без да претеруваат за најмала болка. Сепак, постојат некои симптоми кои никако не смеат да се игнорираат кај децата.
Проблеми со видот
Бебињата не можат да ви кажат дали нивниот вид е заматен, но тоа вие можете да го забележите, на пример, може да забележите ако му е тешко на вашето дете да фокусира одреден објект. Децата на училишна возраст може да имаат потешкотии со читањето, па прашајте го вашето дете дали на училиште гледа сè што се пишува на таблата. Во спротивно, често се случува поради проблеми со видот детето да има проблеми на училиште, кои произлегуваат од тоа што не гледа добро што пишува наставничката и не може да го следи градивото.
Висока температура и тешка главоболка
Децата често имаат зголемена температура предизвикана од помали инфекции и тоа е најчесто безопасна состојба која нивниот организам може лесно да ја надмине. Меѓутоа, ако станува збор за зголемена температура придружена со главоболка, посебно ако е толку силна што детето едвај може да ги задржи очите отворени, веднаш посетете го вашиот педијатар.
Болка во стомакот
Некои деца имаат почувствителен дигестивен систем од другите и често ги боли стомакот, главно поради храната која не им одговара. Но ако забележите дека детето се жали на болка во долниот дел на стомакот, повраќа, има пролив и стомак чувствителен на допир – работите можеби се сериозни, па задолжително посетете доктор.
Екстремен замор
Доколку забележите дека вашето дете е поуморно од вообичаено и го нема нивото на енергија на кое сте навикнати, не го игнорирајте и не го припишувајте тоа на недостатокот на сон. Причината може да биде поголема и на вашиот доктор останува да ја истражи. Може да се работи за анемија, главоболка или депресија.
Проблеми со дишењето
Астмата е сè почеста болест меѓу децата и нејзината инциденца се зголемува со тек на годините. За да ги препознаете симптомите, не ја игнорирајте задишаноста на вашето дете при физичка активност, пискав звук при издишување, потешкотии со дишењето или бавно заздравување од респираторни инфекции.
Екстремно чувство на жед
После неколку часа трчање и игри со врсници, детето разбирливо ќе биде жедно, но екстремната жед е сосема поинаква. Доколку видите дека детето пие многу вода, информирајте го вашиот доктор за тоа, бидејќи тоа е прв симптом на дијабетес.
