Џенет Џексон проговори за нејзината борба со депресијата

„Депресијата е тешка и застрашувачка болест, но за среќа го најдов мојот пат да излезам од неа“, признала славната пејачка, која во моментов е посветена на мајчинството

Годините по 30. роденден биле исклучително тешки за познатата пејачка

Пејачката Џенет Џексон (52) јавно проговори за нејзината борба со депресијата, која, како што вели, е последица на комплексот на инфериорност во детството, како и расизмот и сексизмот во американското општество.

Во статијата објавена во магазинот „Essence“, 52-годишната ѕвезда објаснила дека прв пат била вистински среќна кога го родила своето прво дете во 2017 година.

Пејачката која се прослави во 80-тите години открила дека годините по 30. роденден биле исклучително тешки за неа.

„Беше тешко да се борам против болеста, но, за среќа, го најдов мојот пат да излезам од неа“, вели Џексон во статијата.

Вистинската среќа ја почувствувала со раѓањето на синот

„Фактот дека имав толку малку самодоверба произлегува од чувството на инфериорност во детството. Можеби е поврзано со целите што човек сака да ги достигне, а тешко се постигнуваат. Се разбира, постојат и социјални проблеми како што се расизам и сексизам“, пишува таа и заклучува: „Кога сето тоа ќе го помешате, се создава депресија, тешка и застрашувачка болест“.

Помладата сестра на кралот на поп музиката Мајкл Џексон, кој, исто така, страдаше од депресија, се врати на сцената во 2015 година со нов албум, но потоа неочекувано ја прекина турнејата во март 2016 година и објасни дека сака да заснова семејство, по што во почетокот на 2017 година роди момче.

Искусувањето на депресија еднаш во животот не значи дека сте предодредени повторно да се соочите со неа, но го зголемува вашиот ризик, изјавиле од Националниот институт за ментално здравје на САД

Најмалку половина од луѓето кои имале голема депресивна епизода се изложени на ризик да ја имаат повторно, според Американската асоцијација на психијатри, а 80 проценти од луѓето кои имале најмалку две депресивни епизоди, веројатно, ќе имаат уште една.

Стареењето, исто така, игра улога, вели Дејвид Клемански, директор на Центарот за советување и добросостојба на заедницата на Универзитетот во Њујорк. Генерално, луѓето со текот на годините стануваат посензитивни кон стресот во нивната средина, а тоа, заедно со историјата на депресија, која ја имаат ги става на поголем ризик од повторување на депресивната епизода во иднина. „Тоа е прилично често“, додал д-р Клемански.