Диетата која лекарите и нутриционистите им ја препорачуваат на личностите кои имаат проблем во дигестивниот систем е наречена според почетните букви на намирниците кои содржат малку влакна и лесно се варат. На англиски јазик БРАТ, како што и се вика диетата, е име составено од почетните букви на намирниците кои можете да ги консумирате, а тоа се bananas (банани), white rice (бел ориз), apple sauce (сос од јаболка) и white toast (бел двопек или тост). Оваа диета е корисна затоа што е блага, лесно варлива и не содржи многу маснотии ни вкусови, а тоа е важно затоа што нема да предизвика мачнина. Друга лесна храна со која може да ги замените бананите, оризот, компотот од јаболка и тостот се крекерите, овесната каша, јајцата и пилешкото без кожа. Храната која треба да се избегнува е онаа масната и пржената, како и храната богата со влакна како што се свежото овошје и зеленчук, алкохолот и кофеинот.
Како делува БРАТ диетата?
Ова е диета која се препорачува при стомачен вирус и пролив, а намирниците имаат своја улога во решавањето на проблемот.
Бананата на прво место е добар избор за смирување на надразнетиот стомак. Високото ниво на калиум помага да се надоместат електролитите кои можат да се изгубат, како и пектинот кој помага да се апсорбира течноста во цревата.
Оризот, заради ниското ниво на влакна е лесно варлив скроб, особено без додатоци и кога нема високо количество маснотии кои би можеле да бидат иритирачки за стомакот и да произведат грчеви.
Компотот од јаболка, исто како и бананата е одличен извор на пектин. Високото ниво на влакна во свежите јаболка ги прави претешки за стомакот, па затоа варењето на ова овошје е најдобар начин да се направи полесно за дигестија.
Тостот или двопекот е намирница од преработена пченица, па како таква е подобра кај стомачните проблеми. Со отстранување на надворешната лушпа производите од житарки од цело зрно стануваат полесни за варење. Тостот, како и крекерите, се покажале одлични за враќањето на рамнотежата на организмот и функционирање на органите за варење.
Јогуртот е единствениот млечен производ кој се препорачува кај стомачни проблеми и воспоставува рамнотежа на бактериите во цревата. Тој се смета како одличен пробиотик кој помага во лекување на чувството на жарење кое се јавува во желудникот, исто како и кефирот кој има слично дејство.
Бонус: Два чаја кои се посебно добри при регулирање на дигестивните тегоби се чајот од нане и камилица. Чајот од нане има смирувачко дејство, ги опушта мускулите и ги намалува грчевите и гасовите. Цревните воспаленија, од друга страна, ги намалува чајот од камилица, како и грчевите против кои е одличен природен лек.
