Пациентите со дијабетес тип 2 се изложени на значително поголем ризик од развој на Паркинсонова болест подоцна во животот, покажала новата британска студија. Резултатите покажале дека овие лица имаат 32 отсто поголем ризик од развој на Паркинсонова болест. Интересно е што помладите дијабетичари, на возраст од 25 до 44 години, имаат дури четири пати поголема веројатност да заболат од оваа невродегенеративна болест, која ги напаѓа моторните функции на заболениот, говорот и други функции.
Резултатите од истражувањето покажале дека кај пациенти со дијабетес, кај кои дошло до развој на компликации како што е оштетување на ретината, бубрезите или нервите, постои 49 отсто поголем ризик од развој на Паркинсоновата болест.
Во светот, на повеќе од седум милиони луѓе им е дијагностицирана Паркинсонова болест, хронична невродегенеративна болест што настанува како последица на недостиг на невротрансмитерот допамин во делот на мозокот одговорен за координирани движења.
Паркинсоновата болест е прогресивна дегенеративна состојба, која генерално се карактеризира со треперење на рацете и нозете, бавно движење, вкочанетост и абнормалности во држењето на телото. Во својата најсериозна форма, поврзана е со длабоки физички и ментални нарушувања. Останатите симптоми вклучуваат и депресија, нарушувања во спиењето, констипација, деменција и други.
Со оглед на тоа што за разлика од повеќето клетки во телото, мозочните клетки речиси целосно се потпираат на глукозата како извор на енергија, постоењето на проблем како инсулинот ја контролира употребата на глукозата од страна на клетките, може селективно да влијае на одредени групи на мозочните клетки, пишува медицинското списание „Neurology“.
