Го знаете правилото: осум чаши вода на ден за да останете здрави и да имате доволно течности кои му се потребни на организмот. Иако водата е навистина добра за нашето здравје, доколку пиете вода заедно со оброк, тоа може да го наруши процесот на варење.
Точно е дека органите за варење функционираат подобро кога има доволно течности, но тоа не значи дека треба да се налевате со ладна вода додека се вари оброкот кој штотуку сте го изеле. Премногу вода за време на јадењето може да ја наруши природната концентрација на желудочна киселина која му е потребна на желудникот за правилно да ја свари храната. А особено премногу ладната вода за време на оброкот може да го успори варењето, па дури и да предизвика грчеви кај чувствителни лица.
Како е најдобро да се пие вода
Основно правило е да не пиете вода 15 минути пред да почнете да јадете и најмалку еден час откако ќе завршите со јадењето. Но како и во случајот со сите совети, луѓето претеруваат во придржувањето кон овие совети. Не е неопходно да се избегнува баш секоја течност пред, за време на и по оброкот за да го подобриме варењето. Еве неколку совети:
- Пијте вода во мали голтки
Не мора потполно да ја исклучите водата за време на оброците. Наместо тоа, може да испиете неколку мали голтки за време на оброкот. Тоа е добро доколку оброкот е сув (на пример, кога јадете сендвич). Во водата којашто ја пиете можете да додадете малку лимонов сок или сок од јаболков оцет – тие му помагаат на варењето.
- Подобро да пиете млака (или топла) отколку ладна вода
Студените пијалаци не се добри за време на оброците, особено кај луѓе кои веќе имаат проблеми со варењето. Ако одберете да испиете неколку голтки вода за време на оброкот, тогаш е многу подобро да пиете млака вода. И неколку голтки топол чај (особено од мајчина душица, нане или камилица, кои се добри за стомакот) може да биде добри со оброкот.
- Напијте се вода пред јадење
Ако сте гладни и чекате да ручате, слободно напијте се чаша или две вода половина час или 15 минути пред оброкот. Така не само што ќе бидете помалку гладни, туку и помалку жедни за време на ручекот. Водата која ја внесуваме доволно рано пред оброкот помага да се одржи заштитниот слој кој ја заштитува слузокожата на желудникот од сопствената киселина.
- Пијте доволно вода во текот на денот
Понекогаш не е лесно да се одвикнете од навиката за пиење вода додека јадете, но тоа ќе ви биде многу полесно ако не дозволите да бидете жедни во текот на денот. Одлично е да го започнете денот со една или две чаши млака вода. Исто така, пијте вода меѓу оброците. На тој начин ќе имате доволно течности и нема да ви се пие вода за време на јадењето.
- Бидете умерени
Нема причина да одите во крајности и советот да не се пие вода во текот на јадењето да се претвора во догма. Доволно е да се воздржите од големи количини вода, како и од ладна вода. Ако се напиете некоку голтки млака вода, со лимон или без, или чај за време на оброкот, веројатно, нема да му наштетите на варењето.
