Доцна синоќа на Клиниката за инфективни болести и фебрилни состојби во Скопје, дијагностициран е уште еден, нов случај на коронавирус во земјава. Станува збор за лекар, односно за директор на Клиниката за дерматовенерологија или позната како Кожна клиника. Според информациите од министерот за здравство, Венко Филипче, докторката веќе е хоспитализирана на Инфективната клиника и нејзината состојба е стабилна и има лесна клиничка форма.
“Морам да кажам дека сум многу разочаран во контекст на непочитување на препораките и апелите за самоизолација по патување во ризичните региони. Спомената наша колешка, лекарка пред една недела допатувала од Италија, и изминатата недела, практично последните пет работни дена одела редовно на работа“, истакна Филипче.
Следствено на тој податок, со исклучително внимание се спроведуваат мерки на клиниката од каде доаѓа споменатата лекарка. Екипа на Институтот за јавно здравје во текот на денот прави проценка на степенот на ризик на сите кои контактирале со директорката на Кожната клиника, како вработените, така и пациентите.
Можно е согласно одлуката и проценката на епидемиолозите денес тој оддел да биде целосно затворен. Согласно фреквенцијата и должината на контактот на медицинскиот персонал во болницата, можно е истите да бидат испратени на домашна самоизолација. Истата мерка ќе биде превземена и за пациентите кои се хоспитализирани на Клиниката за дерамтологија, а чија состојба дозволува домашно лекување, и следствена самоизолација.
Сите прегледи кои се закажни на Клиниката за дерматовенерологија, ќе бидат насочени на други јавни здравствени установи и институции со вакви специјалисти. Според Филипче, среќна околност е што споменатата докторка нема ден во амбуланта и немала директен контакт со пациенти кои што доаѓале однадвор во изминатава недела.
“Од епидемиолошката анкета со неа, наведени се и други нејзини контакти, семејство, пријатели и за нив согласно разговорите на епидмиолозите ќе се донесе соодветна одлука каква форма на изолација ќе се спроведе“, изјави Филипче.
Секојдневните апели за самоизолација мора да се сфатат многу сериозно, истакна министерот за здравство, кој потенцираше дека не можеме да ги затвориме границите и сите препораки на експеритите се самоизолација.
“Секој кој доаѓа од ризичен регион, а кој на граница нема симптоми, а тоа е најризичен стадиум на болеста, мора остане во автоизолација 14 дена. На тој начин го штитиме сопственото здравје, на нашите најблиски, но и на сите граѓани“, рече Филипче.
Состојбата на првата пациентка кај која беше дијагностирано присуство на коронавирус е во стабилна состојба, и се чека наодот од контролниот тест за да се знае дали таа ќе биде пуштена дома. Двајцата сопружници, исто така се со лесна форма на вирусот, без поголеми компликации.
