Постарите лица кои често се чувствуваат поспано во текот на денот, се изложени на три пати поголем ризик од зголемување на бета-амилоид во мозокот подоцна во животот, покажала новата студија. Инаку, насобирањето на бета-амилоид во мозокот е карактеристично за Алцхајмеровата болест.
Истражувачите сметаат дека промовирањето на ноќниот сон би можело да помогне во намалување на ризикот од развој на Алцхајмерова болест.
Треба да се напомене дека претходните истражувања веќе покажаа дека ризикот од Алцхајмерова болест може да се намали со соодветна исхрана, вежбање и когнитивна активност.
Она што е особено битно е фактот што спиењето досега не било препознаено како фактор на ризик за Алцхајмеровата болест и покрај податокот дека нарушениот сон би можел да биде знак за болеста
Имено, се сметало дека до нарушување на спиењето кај Алцхајмерова болест доаѓа поради акумулација на бета-амилоид и последични промени на невроните, пишува „Sleep“.
Алцхајмеровата болест спаѓа во групата на невродегенеративни заболувања. Најчесто се јавува кај лицата над 65-годишна возраст и е одговорно за 60 % од дементните заболувања. Болеста прогресира со влошување на когнитивните функции, намалена способност за извршување на дневните активности, промени на расположението и невропсихолошки симптоми.
Првиот случај на оваа болест во 1901 година го опишал германскиот психијатар и невропатолог Алојз Алцхајмер, а пациентката била на возраст од 50 години. Болеста подоцна била наречена Алцхајмерова болест.
