Што е попримамливо – тело на португалската ѕвезда Кристијано Роналдо или стомак како пренапумпана фудбалска топка?
Љубителите на фудбалот овие денови се залепени пред ТВ- екраните, следејќи ги преносите од Светското фудбалско првенство во Русија, еуфорија во која често забораваат на прекумерниот внес на нездрави пијалаци и калории. Здравствените експерти предупредуваат за можно зголемување на телесната тежина.
Благодарение на високиот калориски внес за време на натпреварите многу фанови ќе стават дополнителни килограми до финалето на 15 јули, предупредуваат експертите. Една од главните причини за дебелина ќе биде внесувањето на засладени пијалаци, истакнале од Медицинскиот факултет во Виена.
Марија Ваколбингер, нутриционистка од споменатиот факултет, препорачува разредување на пијалаците за да се намали внесот на шеќер.
„Има денови кога се играат по три натпревари. Можно е да го намалите внесувањето на калории со мешање на пијалаците со кисела вода“, вели нутриционистката.
Сепак, во поголема опасност се оние кои навиваат за губитничкиот тим.
„Консумацијата на храна со заситени масти се зголемува за 16 отсто после секој пораз, додека после победнички натпревар, паѓа за девет проценти“, истакнал Пјер Шандон, маркетинг професор на INSEAD бизнис школата во Париз, во коментар за истражување на навиките во исхраната на навивачите.
Шандон и неговиот колега Јан Корнел објасниле дека не се работи само за заситени масти, туку дека општата консумација на храна расте за 10 отсто по поразот, односно се намалува за 5 отсто по победата.
„Врската помеѓу навиките во исхраната и спортските резултати беше најсилна во помалите градови каде навивањето за некои екипи се смета буквално за религија“, изјавил Шандон, додавајќи дека „никој не јаде брокула откако неговиот тим ќе го изгуби натпреварот“.
Во случај на пораз се поткопува егото на навивачите, кои поразот на својот тим го поистоветуваат со сопствен пораз, па им треба инстант „задоволство“ во форма на мрсна и калорична храна како пица, чипс и помфрит. Победниците, пак, се чувствуваат добро и поради нивната голема самодоверба можат да бидат поцврсти и поверојатно е дека ќе посегнат по здрава храна.
