Со пригодна свеченост, денес во Собранието беа врачени највисоките државни награди “Св. Климент Охридски“, и тоа за долгогодишни остварувања во областа на здравството, културата, уметноста, заштита и унапредување на човековата околина и со социјалната дејност од јавен интерес за земјава. Наградени беа пулмологот, проф. д-р Дејан Докиќ, писателот Димитар Башевски, примадоната на Националната опера и балет Весна Ѓиновска-Илкова, познатата исполнителка на македонска народна песна Виолета Томовска и албанологот проф. д-р Агим Пољоска.
За доделувањето на државната награда „Св.Климент Охридски” за 2019, како највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес на Македонија, одлучи одборот на чело со академик Влада Урошевиќ.
„Некако се совпаѓа највисоките награди да се доделуваат во есен, исто како и ние уметниците кога ги собираме плодовите од нашиот труд и работа. Убаво е во бучавата од партиски, политички, сообраќајни и други гласови, со ваквите прилики за еден момент се свртува вниманието кон нешто што е подолгорочно“, рече писателот Башевски, заблагодарувајќи се во име на сите добитници.
(А.Стојановска)
