Доењето претставува најприроден, најблагороден, најтопол и најдобар начин на исхрана на едно доенче особено во првите шест месеци, па оттука ако доењето е најприродниот начин на исхрана се поставува прашањето –
Дали мајката треба да биде лимитирана да го храни своето дете само дома или тоа може и треба да го прави и на јавни места?!
Во праксата се покажало дека жените кои решиле своето чедо да го подојат пред очите на јавноста се осудени во најмала рака на прекорувачки погледи, за разлика од оние кои своите гради ги покажале на ТВ-екраните, на фотосесии, филмови, реклами… тие „собираат“ погледи и поени, се разбира, во корист на уметноста?! Оттука сосема логично се поставува прашањето – Зошто двојни аршини и дали е нормално ако детето треба да јаде да му се ускрати тоа право. Па зарем јадењето, да речеме, хамбургер на плоштад е срамно?!
На оваа тема зборувавме со д-р сци. Александар Сајковски, педијатар, кој вели дека една од пречките за доење во јавност е ступидниот став, кој се јавува во назадни и ретроградни средини.
Ако се гледаат правата на жените во нормалните земји, земјите со нормална демократија и нормален поглед кон светот и животот тогаш за да имаат слобода жените, односно мајките треба да имаат не само лична способност за делување и влијание во општествениот живот, туку, исто така, и право да го сторат тоа што е природно и нормално – да го дојат своето дете секаде според потребите на бебето! Една од пречките за најприродниот начин на исхрана, односно за доењето, за жал, продолжува во некои назадни и ретроградни средини да биде ступидниот став и прашањето за тоа дали доењето е прифатливо да се прави во јавноста. Како најеклатантен пример за поддршката на мајката и нејзиното право на доење е законот за еднаквост на половите кој во Велс и Англија, спречувањето на доење на јавно место го третира како криминален акт на полова дискриминација, а во Шкотска доењето на јавно место е заштитено од 2005 година и со кривични одредби, при што за кривично дело се смета ако некој ја спречи мајката да го дои своето дете на јавно место. А каде сме ние? Оставам на вашата фантазија и убедување да видите каде сте лично вие со вашиот став во однос на доењето на јавно место, а со тоа да видите каде сте во однос на развиениот и модерен свет“, вели д-р сци. Александар Сајковски, според кого доењето претставува најприроден, најблагороден, најтопол и најдобар начин на исхрана на едно доенче особено во првите шест месеци.
Позната манекенка испрати моќна порака: Ако го осудувате доењето во јавност, едуцирајте се!
Русокосата манекенка Кендис Свонпул, инаку еден од ангелите на Викторијас сикрет, кога на свет го донесе синот Анакан воопшто не криеше од јавноста дека ужива во мајчинството, па речиси секој момент со малиот наследник сакаше да го сподели со јавноста. Токму една нивна заедничка фотографија ја „потресе“ јавноста.
Имено, Кендис со своите виртуелни пријатели сподели фотографија на која во преден план и се голите гради и, секако, малиот Анакан кој цица. Во описот под фотографијата Кендис напиша: „Во денешно време многу жени се срамат да дојат во јавноста или дури заради тоа се исфрлени од јавните места. Бев приморана да се чувствувам посрамено и да се покријам кога го дојам своето бебе на јавни места, додека моите топлес фотографии никому не му пречеа затоа што се правени во име на уметноста…? Јавноста повеќе не реагира на сексуализација на градите, ниту на насилството на ТВ-екраните. Зошто би било поинаку кога се работи за доењето? Доењето не е ништо сексуално, тоа е природно. Оние кои сметаат дека е лошо да се дои сопственото дете во јавноста, треба да се едуцираат за предностите кои доењето ги има и за мајката и за детето, па и за општеството како целина.“
пишува: Александра С.
aleksandra@panacea.mk
