Околу 17 проценти од случаите на деменција би можеле да се спречат ако луѓето земаат доволна количина на витамин Д. Првата светска студија која го докажува тоа ја спроведе Универзитетот Јужна Австралија. Научниците откриле директна врска помеѓу деменцијата и недостатокот на витамин Д – а со тоа и важен и евтин пристап за превенција.
Деменцијата е хроничен или прогресивен синдром кој со годините доведува до влошување на когнитивните функции, размислувањето и помнењето. Повеќе од 55 милиони луѓе ширум светот страдаат од деменција, а секоја година се дијагностицираат 10 милиони нови случаи.
Како недостатокот на витаминот Д влијае на мозокот
Студијата, која ја поддржал Британскиот национален совет за здравство и медицински истражувања, анализирала податоци од 294.514 учесници од Велика Британија, а целта била да се испита ефектот на витаминот Д врз здравјето на мозокот – односно ризикот од деменција и мозочен удар. Најголем дел од испитаниците во истражувањето биле жени на возраст од 60 до 73 години, без хронични заболувања.
Се покажало дека хроничниот недостаток на витамин Д (под 25 nmol/L) не е поврзан со помал волумен на мозокот, но донекаде го зголемува ризикот од мозочен удар. Најважното откритие е дека со анализа е пронајдена причинско-последична врска помеѓу недостатокот на витамин Д и појавата на деменција.
Комплетните резултати од студијата неодамна беа објавени во списанието The American Journal of Clinical Nutrition. За водачот на студијата, професорката Елина Хипенен, резултатите покажуваат колку витаминот Д е важен во превенција на деменција и дека постои апсолутна потреба за борба против неговиот недостаток, кој сè уште постои во многу делови од светот.
“Навистина, кај британската популација забележавме дека до 17 проценти од случаите на деменција можеле да се избегнат доколку нивото на витамин Д се подигне на нормала – 50 nmol/L“, објаснува професорката.
Значењето на улогата на витаминот Д
Колку е витаминот Д е важен за менталното и физичкото здравје, покажува секоја нова студија, нагласува проф. Хипенен. “Витаминот Д е хормон прекурсор за кој се утврдува сè поголем спектар на позитивни ефекти, вклучувајќи го и здравјето на мозокот“.
“Деменцијата е прогресивна и исцрпувачка болест која може да биде погубна и за поединците и за семејствата. Значи, мораме да се погрижиме никој во светот да не страда од сериозен недостаток на витамин Д“, заклучува проф. Хипенен и додава: “На повеќето од нас веројатно ни е добро, но за секој кој од која било причина можеби не добива доволно витамин Д од изложување на сонцето, прилагодувањето на исхраната можеби не е доволно и веројатно е потребно земање суплементи“.
Користејќи ја оваа сеопфатна анализа, таа и нејзиниот тим можеле уште еднаш да покажат дека нешто толку евтино и лесно достапно како витамин Д препарат- може да има огромно влијание на светското здравје.
