Научниците, барем според истражувањето објавено во магазинот „Сајконеуроендокринолоџи“, тврдат дека бракот значи помалку стрес. Спроведените истражувања покажале и дека луѓето кои се во брак имаат најниско ниво на кортизол – хормон на стрес. Главниот научен аргумент е дека луѓето полесно се справуваат со стресот кога не се сами. Важно е да се напомене и дека највисоко ниво кортизол имале оние кои биле во брак, па се развеле, но и оние коишто се соочиле со смртта на својот партнер.
Нивото на кортизол се менува во текот на денот – највисоката точка ја достигнува во утринските часови, а обично, како што тече денот така и тој параметар опаѓа. Во таа смисла, истражувањето бележи побрз пад меѓу венчаните испитаници во споредба со другите групи. Статистиката, пак, открива дека како што стресот се поврзува со настанокот на ракот или срцевите болести, така луѓето кои се во брак се помалку изложени на ризикот од овие болести.
Но имајте на ум дека ова не значи оти треба да се омажите/ожените по секоја цена зашто така нема да го спречите стресот, напротив!
