Студија спроведена од страна на група научници од Стивенс институтот за технологија во Њу Џерси открива дека дури и самиот мирис на кафе е доволен за подобра работа на мозокот. Низ тестирањата се покажало дека луѓето кои престојувале во просторија исполнета со мирис на кафе, имале подобри резултати на тестовите, бидејќи мозокот реагирал исто како да консумирале кофеин. За кафето и порано (се разбира, во умерени количества) се сметаше дека го намалува ризикот од срцеви заболувања, го поттикнува метаболизмот и ја намалува шансата од прерана смрт. Тоа е потврдено во низа студии од кои, оваа последната опфатила половина милион возрасни лица од Британија.
Истражувањете се базира на плацебо ефектот. Учесниците биле прашувани што мислат за разните мириси, па се покажало дека луѓето веруваат оти на нив просториите кои мирисаат на кафе делуваат стимулативно, за разлика од просториите без или со цветен мирис. Попрецизно, научниците тестирале студенти кои полагале испит по алгебра. Групата на студенти која тестовите ги решавала во просторијата со мирис на кафе постигнала подобри резултати од другата група која решавала тестови во соба без мирис.
Ова значи дека човековиот мозок препознавајќи го познатиот мирис на кафе реагира на многу сличен начин како кога кафето ќе се испие. Кофеинот е стимуланс, што значи дека го активира мозокот и средишниот нервен систем, го намалува заморот и ги прави луѓето побудни и пофокусирани на задачи. Други истражувања, пак, покажале дека кафето уште го намалува и ризикот од депресија, го поттикнува помнењето и штити од Алцхајмерова болест.
