Една неодамнешна британска студија го нагласува значењето на појадокот кога е во прашање детското здравје и потенцијалните опасности по здравјето во случај на редовно прескокнување на овој оброк. Во студијата учествувале 800 деца на возраст од 4 до 10 години и 900 адолесценти на возраст до 18 години. Нивната исхрана била следена во периодот од 2008 до 2012 година.
Научниците кои биле дел од истражувањето утврдиле дека речиси една третина од учесниците кои го прескокнувале појадокот не внесувале соодветно количество железо. Од друга страна, пак, дури 4 проценти од децата кои редовно појадувале не внесувале доволно од овој важен минерал. Кога станува збор за калциумот, меѓу испитаниците кои го прескокнувале појадокот, недоволен внес на овој минерал е утврден кај 20 отсто од нив, во споредба со само 3 проценти од децата кои редовно појадувале. Меѓу испитаниците кои го прескокнувале појадокот забележан е и помал внес на фолна киселина и јод.
Научниците утврдиле дека отприлика 7 отсто од децата на возраст од 4 до 10 години секојдневно го прескокнуваат појадокот, додека овој процент е значително поголем (дури 25 проценти) кај децата на возраст од 11 до 18 години.
