Американските научници откриле дека едно соединение може да ни помогне да го забавиме процесот на стареење на тој начин што ќе го забрза нашиот метаболизам, ќе го зголеми нивото на енергија и ќе ја подобри чувствителноста на инсулин. Се работи за никотинамид мононуклеотид (или скратено НМН), кој може да се најде во овошјето и зеленчукот, а кој нашето тело природно го произведува. Истражувањата спроведени врз животни потврдиле дека ова соединение навистина има антиејџ ефект и сега научниците планираат да продолжат со истражувањата врз доброволци.
Она што уште било забележано за време на спроведувањето на истражувањето е дека НМН имал ефект само кај постарите животни, не и кај младите. Причина за тоа е фактот дека количеството на НМН во организмот се намалува со годините, така што на постарите животни ова соединение навистина им било потребно и како резултат кај нив е забележано подобрување на метаболизмот и нивоата на енергија.
Еве кои намирници содржат НМН:
Никотинамид мононуклеотидот го има во доматите, авокадото, брокулите, зелката, краставиците… Меѓутоа, тоа не значи дека ќе останеме вечно млади ако постојано го јадеме овој зеленчук. Животните кои учествувале во експериментот за антиејџ ефектите на НМН добивале значително поголеми количества од оваа состојка, отколку што ние можеме да внесеме низ урамнотежена исхрана.
Сепак, овој зеленчук, освен помали количества на НМН, на организмот ќе му обезбеди мноштво антиоксиданти, витамини и минерали кои синергиски придонесуваат за здравјето на организмот и ја намалуваат штетата предизвикана од дејството на слободните радикали.
