Во врелите летни денови не постои ништо подобро од домашен сок од нане кој ќе го подигне вашето тело и дух. Освежувачкиот вкус на нането ќе го закрепне телото и ќе ви ја врати енергијата. Во комбинација со парчиња лимон и лед, овој сируп делува благотворно на сите наши сетила.
Потребни состојки: 
• 300 г свежо нане
• 5-6 лажички шеќер
• 3 ќесички лимонтус
• 3 литри вода
• 3 кг шеќер
Начин на подготовка:
Измијте го нането со млака вода и убаво исчистете го. Потоа ситно исечкајте го и ставете го во еден сад. Исечканото нане помешајте го со 5-6 лажички шеќер и додадете го лимонтусот. Се добро изгмечете со раце. Ваквата смеса прелијте ја со 3 литри вода и оставете да отстои 24 часа. Потоа процедете низ газа и во добиената течност додадете 3 килограми шеќер. Оставете да отстои уште 24 часа со повремено мешање. Доколку не ставате конзерванс во сирупот, тој може да стои околу 2 месеци во фрижидер. Доколку сепак ставите конзерванс, сокот мора да отстои најмалку две недели пред да почнете со негова консумација.
