Престанокот на пушењето драстично го намалува ризикот од бројни болести меѓу кои се хронична опструктивна болест и рак на белите дробови. Дробовите почнуваат да се опоравуваат штом личноста престане со пушење, но нивното опоравување всушност трае со години. Еден од важните фактори кои влијаат на здравјето се и годините. После 35-та година од животот функцијата на белите дробови полека опаѓа – дијафрагмата слабее, слабеат и респираторните мускули, алвеолите го губат својот облик итн.
Некои поранешни истражувања покажале дека исхраната богата со овошје и зеленчук може да го намали ризикот од хронична опструктивна болест на белите дробову кај сегашните и некогашните пушачи. Имено, секоја дополнителна порција овошје и зеленчук во текот на денот го намалува ризикот од овие болести за 4 до 8 проценти.
Сега и една нова студија укажува на позитивните ефекти од исхраната која е богата со домати врз здравјето на белите дробови како кај непушачите така и кај пушачите. Авторите на студијата утврдиле дека кај личностите кои јадат барем 2 домати дневно функциите на белите дробови побавно опаѓаат отколку кај личности кои во просек јадат помалку од еден домат дневно. Тие, исто така, сметаат дека одделни состојки во свежиот домат ја поттикнуваат репарацијата на од пушењето оштетените бели дробови.
