Започнете го денот со доза слатка енергија во вашата чинија! За подготовка на овој здрав појадок ви се потребни само 20 минути. Во него може да уживате дури и ако не се снаоѓате најдобро во кујната, бидејќи подготвувањето е навистина едноставно, а кога еднаш ќе го пробате ова слатко совршенство, без проблем ќе станувате неколку минути порано за да го подготвите пред да заминете на работа.
Рецептот може да го прилагодите и да комбинирате состојки по ваша желба. Ако сте љубител на чоколадо, искомбинирајте го со некој здрав чоколаден намаз или со прелив од шумски плодови. Ако не сте љубител на чоколадото, можете да исечкате банана на кругови и да прелиете со мед или јаворов сируп. Можете да додадете и од вашите омилени јаткасти плодови. Комбинации има навистина многу, па секој ден можете да уживате во поинаков појадок.
Потребни состојки:
- 1 зрела банана
- 1 шолја незасладено млеко од соја
- 1/2 лажичка цимет
- 1/4 лажичка арома од ванила
- 6-8 парчиња интегрален тост
- кокосово масло
- По желба: мед или јаворов сируп, какао крем, прелив од чоколадо, прелив од шумски плодови и др.
Подготовка:
- Испасирајте ја бананата со виљушка. Потоа додадете го млекото од соја, циметот и аромата од ванила, и сето тоа заедно добро промешајте го.
- Во тавче стопете малку кокосово масло.
- Парчињата тост натопете го во смесата (од двете страни), па ставете ги во загреаното тавче.
- Пржете 3-4 минути од секоја страна, се додека не добие златно-кафеава боја.
- Се служи топло со свежо овошје и мед или јаворов сируп или со некој чоколаден намаз.
