Повременото дремење во текот на денот, еднаш до два пати неделно, може речиси на половина да го намали ризикот од срцев или мозочен удар, покажала една швајцарска студија. Научниците ја проучувале врската меѓу просечното траење на дневниот сон и неговата зачестеност и ризикот од срцев удар, мозочен удар и затајување на срцето.
Во студијата биле следени навиките за спиење на 3462 пациенти, случајно одбрани жители, на возраст од 35 до 75 години и нивната здравствена состојба во период од 5 години.
Повеќе од половина рекле дека не спиеле преку ден во последните седум дена, 19 отсто спиеле попладне еднаш или до два пати неделно, додека 12 отсто спиеле преку ден три до пет пати. 11 проценти, пак, спиеле шест до седум пати во текот на денот.
Во студијата било заклучено дека повременото спиење преку ден, еднаш до два пати неделно, поврзано е со речиси двојно помал ризик од срцев удар, мозочен удар или затајување на срцето во споредба со оние кои не спиеле повремено.
Докторите велат дека остануваат повеќе прашања од одговори, време е да се почне да се истражува важноста на дневното дремење за здравото срце.
