Познато е дека ноќното спиење го подобрува имунолошкиот систем, ја враќа енергијата и продуктивноста, но и попладневното кратко дремнување си има свои предности.
За денеска е доцна, но утрешниот ден искористете го да одморите попладне. Имено, професорот Ричард Вајсман од Универзитетот Хертфордшир вели дека кратките дремки, во траење од триесет минути, им помагаат на луѓето да останат фокусирани, продуктивни и креативни.
„Новите истражувања покажуваат дека после краткото попладневно дремнување луѓето се едноставно посреќни. Додека подолготрајното спиење во текот на попладнето е врзано за повеќе здравствени ризици“, додава професорот.
Во студијата спроведена во рамки на Меѓународниот фестивал на науката во Единбург, учествувале илјада луѓе кои пополнувале онлајн прашалници за своите навики за спиење.
Резултатите покажале дека луѓето кои кратко спиеле во попладневните часови имале резултат од 3,67, додека оние кои спиеле долго или воопшто не спиеле, имале полоши резултати (3.52 и 3.44)
Дури 66 проценти од испитаниците изјавиле дека се чувствувале среќни по кратката дремка. Истражувањето покажало дека 43 проценти од испитаниците на возраст меѓу 18 и 30 спијат подолго во текот на денот, додека 30 проценти од луѓето над 50 години го прават истото.
