Последниве недели еден од најчестите симптоми на кој се жалат лицата кои закрепнале од КОВИД-19 е опаѓањето на косата. Но, ново истражување на 1567 лица кои се опоравиле од оваа болест, укажува на 98 долготрајни симптоми.
Меѓу тие симптоми најчести се заморот, болки во мускулите и зглобовите, краток здив или потешкотии со дишењето, несоница, проблеми со концентрацијата или фокусирањето, главоболка и анксиозност.
Истражувањето кое се уште не е објавено во стручно списание, произлегло од Фејсбук страницата Survivor Corps, онлајн група во која луѓето зборуваат за своите искуства во борбата со КОВИД-19, а го воделе д-р Натали Ламберт од Универзитетот Индиана и проф. Венди Чунг од Медицинскиот центар на Универзитетот Колумбија. Досегашните студии покажуваат дека коронавирусот не го напаѓа само системот за дишење, туку влијае на низа органи или системи во човечкото тело (системска болест).
“КОВИД-19 е системска болест која погаѓа многу делови во телото, вклучувајќи го и мозокот. Но, деталниот механизам како новиот коронавирус го погаѓа мозокот засега не е познат. Тоа може да биде поради директен напад на вирусот на мозочните клетки или индиректни механизми. Неговото делување донекаде е слично со многу други системски вируси кои исто така имаат силни ефекти на нервниот систем“, вели проф. Димитри Краинц, началник на Клиниката за неврологија на Нортвестерн универзитетот во Чикаго.
Имунолозите истакнуваат дека постој бројни докази дека КОВИД-19 не е “обичен грип“, туку сериозна болест која може долгорочно да остави значајни последици, кои се однесуваат на хронични оштетувања, особено на срцето и белите дробови, но и други орагни како бубрези, како и развојот на синдром на хроничен замор.
Еден од водечките инфектолози во Хрватска, д-р Владимир Крајиновиќ од Клиниката за инфективни болести во Загреб смета дека во случајот со КОВИД-19 треба да се разграничат полесните од потешките случаи на болеста.
“Мислам дека е најисправно да се каже дека се работи за потенцијално системска болест, бидејќи во благи и средно тешки случаи тоа е само респираторна болест, бо во најтешките е системска и може да се манифестира како мултиорганска дисфункција. Но, присутноста на вирусот во крвта е исклучително ретка, барем според литературата. По секоја инфекција некое време остануваат различни пречки, зависно од тежината на болеста и од компликациите. Според мое мислење, се е веќе видено и опишано кај другите вируси“, заклучува д-р Крајиновиќ.
