Човечкото тело е поотпорно отколку што се мисли. На пример, ако дарувате половина литар крв, вашето тело брзо ќе ја надомести. Дури и ако останете без поголемо парче од некој витален орган, сепак, можете да преживеете. Луѓето можат да живеат прилично нормално дури и со само половина мозок, а постојат органи кои може целосно да ги отстраните, а да немате поголеми проблеми потоа, пишува „The Independent“.
- Слезина
Овој орган се наоѓа на левата страна на абдоменот, под ребрата. Најчесто се отстранува по некоја повреда, бидејќи е прилично изложен поради неговата положба во телото. Обложен е со тенка обвивка, која лесно може да прсне.
Слезината се користи за складирање и рециклирање на црвените крвни клетки, а без неа може да се живее, бидејќи црниот дроб игра прилично голема улога во рециклирањето на црвените крвни клетки.
Постојат органи кои може целосно да ги отстраните, а да немате поголеми проблеми потоа
- Желудник
Желудникот има две главни функции: механичко варење, бидејќи ја ситни храната и хемиско варење со помош на киселини кои помагаат да се разградат парчињата храна.
Понекогаш се отстранува со хируршка интервенција поради рак или траума, а во тој случај, хирурзите го спојуваат езофагусот директно на цревата. По опоравувањето, луѓето можат да јадат нормално.
- Репродуктивни органи
Примарни репродуктивни органи се јајниците и тестисите. Овие органи доаѓаат во пар, па ако останете без еден, се уште можете да имате деца.
Тие обично се отстрануваат поради рак или повреда. Истражувањата покажуваат дека жените по отстранување на јајниците можат подеднакво долго да живеат како и со нив, а кај некои мажи, по отстранувањето на тестисите, дури и се зголемува очекуваната должина на животот.
На жените, исто така, може да им биде отстранета матката, по што повеќе не можат да раѓаат.
- Дебело црево
Дебелото црево е дел од дигестивниот тракт, а долго е метар и половина.
Се состои од четири дела: слепо црево, дебело црево, рамно црево и анален канал. Неговата основна функција е апсорпција на водата и присобирање на несварените остатоци, кои ги претвора во фекалии.
Понекогаш, поради болест, мора да се отстрани еден негов дел или цело. Луѓето најчесто се опоравуваат целосно, но најчесто треба да ја прилагодат исхраната по операцијата.
- Жолчно ќесе
Жолчниот меур се наоѓа под црниот дроб на десната страна на абдоменот, веднаш под ребрата. Црниот дроб произведува жолчка, која помага при разградување на маснотиите, а таа жолчка се чува во жолчното ќесе.
Понекогаш во жолчното ќесе се појавуваат камчиња, па е потребно да се отстрани.
- Слепо црево
Слепото црево е почетниот дел на дебелото црево. Она што луѓето го нарекуваат слепо црево е, всушност, црвовиден израсток, кој се наоѓа на местото каде што се спојуваат дебелото и тенко црево. Нема никаква улога во организмот.
При воспаление на слепото црево, тоа мора да биде хируршки отстрането, а операцијата се изведува кога постои опасност содржината на слепото црево да се разлие врз околните органи.
- Бубрези
Повеќето луѓе имаат два бубрега, но можно е сосема нормално да се живее само со еден од нив, па и без нив, но во тој случај е потребна дијализа.
Бубрезите ја имаат улогата на филтрирање крв, регулирање на осмотскиот притисок, концентрација на јони во крвта и волумен и киселоста на телесните течности.
Постојат различни причини поради кои луѓето мора да отстранат еден или два бубрези: наследни болести, оштетувања од дрога и алкохол или инфекции. Ако човек остане без бубрезите, нивната функција ја презема дијализата.
Очекуваниот животен век на лице без бубрези зависи од неколку фактори: тип на дијализа, пол, други болести од кои страда лицето и возраст на пациентот.
Неодамнешните студии покажаа дека лице, кое е подложено на дијализа на возраст од 20 години, може да живее од 16 до 18 години, додека лице, кое во шеесеттите години ќе тргне на дијализа, може да очекува само пет години од животот.
