Новото истражување покажало дека две мошне специфични грешки во исхраната се поврзани со заболување од рак – консумирање премалку млечни производи и премалку житарки од цело зрно. Стручњаците тврдат дека овие грешки се главниот виновник за 5,2 отсто од случаите на инвазивен канцер годишно. Научниците додаваат дека консумирање на премногу црвено месо, обработено месо, шеќер и засладени напитоци, исто така, се можни причини за рак. Ова студија е објавена во стручниот магазин JNCI Cancer Spectrum, а открила дека исхраната била можна причина за околу 80 000 случаи на инвазивен канцер во 2015 година меѓу возрасните во Америка.
Веќе некое време се зборува за тоа дека одредени намирници – шеќер, обработена храна и црвено месо – го зголемуваат ризикот од заболување од рак, но досега не било познато дека опасноста се јавува кај оние кои не внесуваат доволно млечни производи и целовити житарки.
Стручњаците исто така, утврдиле кои форми на рак најчесто се јавуваат како резултат на лошата исхрана – во 2015 година 38 отсто од случаите на заболување од колоректален канцер се поврзани со лошата исхрана, како и 25,9 отсто од случаите на појава на канцер во устата, ждрелото и гркланот. Со студија е утврдено и дека околу 16 отсто од овие видови рак поврзани со исхраната се поврзани и со дебелината.
„Исхраната е еден од факторите на кои лесно може да се влијае заради превенција од рак“, вели водечкиот автор на студијата доктор Фанг Фанг Жанг. „Овие резултати покажуваат дека е мошне важно да се подобри внесот на клучни групи намирници и нутритиенти.“
Резултатите од ова истражување сугерираат дека најдобар начин за намалување на ризикот за заболување од рак е здравата, балансирана исхрана, која подразбира консумирање на сите групи намирници. Тоа е посебно важно да се нагласи затоа што диетите кои налагаат „исфрлање“ на цели групи намирници се се попопуларни.
