Повеќе од 14 проценти од светската популација прележала лајмска борелиоза, најчестата болест што ја пренесуваат крлежите, покажало истражување објавено вчера.
Средна Европа имала најголема стапка на зарази со 20 проценти, додека мажите постари од 50 години кои живеат во руралните средини биле најзагорзени, покажала студијата објавена во списанието BMJ Global Health.
СИМПТОМИ
Состојбата ретко е смртоносна, но луѓето кои ќе ги касне заразен крлеж често добиваат осип и страдаат од симптоми слични на грип, вклучувајќи болки во мускулите и зглобовите, главоболка, мачнина и повраќање.
За да дознаат колку лајмската болест е вообичаена низ светот, научниците собрале податоци од 89 студии.
Бактеријата Borrelia burgdorferi, која ја предизвикува болеста, пронајдена е во крвта на 14,5 проценти од 160.000 испитаници.
“Ова е најсеопфатен и најсовремен системски преглед на светската преваленца (распространетост) на болеста“, изјавија научниците.
Двојно зголемена е зачестеноста на болеста
По централна Европа, регион со највисока стапка на антитела, следи Источна Азија со 15,9 отсто, Западна Европа со 13,5 отсто и Источна Европа со 10,4 отсто. Карибите имаат најниска стапка, од само два отсто.
Досегашните истражувања покажале дека инциденцата (зачестеноста) на болести кои се пренесуваат преку крлежи е двојно зголемена во последните 12 години.
Причините за растот се подолгите и сушните лета поради климатските промени, миграцијата на животните, губењето на живеалиштата и “се почестиот контакт со домашните миленици“, се наведува во студијата.
Земјоделците и работниците кои се во редовен контакт со животни како кучиња и овци биле најмногу изложени на ризик да бидат каснати од заразен крлеж, покажало истражувањето.
