Истражувањето на два лека покажало значително подобрување кога е во прашање стапката на преживување на болните од ебола, па таа болест наскоро би можела да стане излечива. На пациенти во Конго се тестирани четири лека. Се покажало дека два се значително поефикасни од останатите во лекувањето на оваа болест.
Според извештајот на Светската здравствена организација, доколку терапијата со овие лекови се почне во рана фаза на болеста можноста за преживување е повисока од 90 отсто.
Лековите делуваат така што го напаѓаат вирусот на ебола со антитела, поништувајќи го неговото влијание на клетките. Лековите се развиени со употреба на антитела кои потекнуваат од личности кои преживеале ебола.
„Потполно излекување можеби не е можно дури и ако имате 100 отсто ефикасен лек. Човечкиот фактор и понатаму е важен – да се побара помош во рана фаза“, вели Кристијан Линдмаер од Светската здравствена организација.
Превенција, надзор, активно пронаоѓање на случаите и прифаќање на членовите на тимот и партнерите во заедницата се исклучително важни за стапката на преживување. Луѓето се охрабруваат да внимаваат на своите најмили и уште со првите симптоми да побараат нега и помош.
Вирусот се пренесува со директен контакт со крв, телесни течности и преку ткива од заразени животни или луѓе. После периодот на инкубација, во рок од 2 до 21 ден се појавуваат рани симптоми на болеста, како зголемена температура, мачнини, треска и интензивни болки во мускулите.
Подоцнежните знаци на фаталната болест се појавуваатѕ во зависност од тоа кои органски системи се зафатени со вирусот. Еболата во последната година во Конго однела повеќе од 1 800 животи.
