Грипот и обичната настинка се заразни респираторни болести, но тие се предизвикани од различни вируси. Грип предизвикуваат само вируси на грип, додека настинката може да биде предизвикана од бројни различни вируси, вклучувајќи риновируси и други сезонски вируси.
Со оглед на тоа дека грипот и настинката имаат слични симптоми, може да биде тешко да се разликуваат само врз основа на симптомите. Сепак, Американскиот центар за контрола и превенција ан болести (ЦДЦ) издвојува симптоми кои ја карактеризираат и едната и другата состојба.
Генерално гледано, грипот е полош од обичната настинка, а симптомите обично се поинтензивни и почнуваат нагло. Настинката е обично поблага од грипот. На лицата со настинка почесто им тече носот или им е затнат, отколку на оние кои имаат грип. Настинката обично не доведува до сериозни здравствени проблеми, како што се воспаление на белите дробови, бактериски инфекции или хоспитализација. Од друга страна, грипот може да има сериозни компликации.
Симптоми на грип може да бидат треска, кашлица, болка во грлото, течење или затнат нос, болки во мускулите или телото, главоболка и замор.
Вообичаени симптоми на настинка се кивање, затнат нос и болка во грлото.
Симптомите на настинка обично се поблаги од симптомите на грип и генерално не доведуваат до сериозни здравствени проблеми, а симптомот кој главно ја разликува настинката од грипот е течење на носот, односно затнат нос.
