Истражувачите во период од шест години следеле повеќе од илјада мајки и нивните деца. Резултатите биле дека ризикот од добивање астма бил помал кај оние деца кои од мали нозе пиеле непреработено млеко. Студијата покажала корелација помеѓу консумирањето млеко и ризикот за развој на астма кај децата.
Во долгогодишната студија следени биле 1 133 мајки од пет европски земји. Тие биле следени во период од раѓање на детето до неговата шеста година. Сите испитаници живееле во рурални подрачја.
Еднаш годишно мајките биле испитувани за количината на млеко што детето ја консумира. По четвртата година на детето, истражувачите земале примерок од млекото што го пиело детето, како и крв од детето. По шест години следење на децата, истражувачите заклучиле дека децата кои редовно пијат непреработено млеко од фарми, имаат значително помали шанси да заболат од астма, во споредба со децата кои пијат преработено млеко од продавница.
Истражувачите нагласуваат дека е исклучително важен процентот на маснотии во млекото, како и омега-3 масните киселини и нагласуваат дека за децата е важно да конусмираат свежо млеко, необработено. Тие се надеваат дека оваа студија ќе влијае на тоа индустријата да ги ублажи методите за обработка на млекото за да се задржат оние хранливи својства кои влијаат на здравјето и развојот на детето.
