Хроничната опструктивна белодробна болест (ХОББ) е тивка воспалителна болест на белите дробови и белодробниот паренхим, која предизвикува опструкција на струење на воздухот, а ја предивикува долготрајното пушење (активно или пасивно) или вдишување на загаден воздух како од природата, така и во затворен простот.
Симптомите се појавуваат постепно, како кашлица, искашлување и краток здив, на почетокот при напор, а подоцна и во мирување.
МИНИ ТЕСТ – БОЛЕДУВАТЕ ЛИ ОД ХОББ?
- Кашлате ли често повеќе пати на ден?
- Кога кашлате дали често искашлувате слуз?
- Останувате ли без здив побрзо од своите врсници?
- Дали сте пушач или бивши пушач?
Доколку сте одговориле со “ДА“ на три и повеќе прашања, потребно е веднаш да се посоветувате со лекар, кој ќе ве упати на спирометрија, односно испитување на белодробната функција.
НЕ ПОСТОИ ЛЕК…
Прогресијата на болеста може да се забави ако на време се открие, адекватно се лекува и ако целосно се исфрли пушењето од секојдневниот живот, односно се намали или елиминира изложеноста на загаден воздух.
Во моментов не постои лек за ХОББ, туку само лекови кои ги олеснуваат тегобите и ја забавуваат прогресијата на болеста, додека во најтешката фаза на болеста, квалитеот на живот е многу низок поради зависноста на болниот од кислород кој го добива на маска.
Поради природата на болеста, потребно е пациентот строго да се придржува на лекарските упатства за да се забави прогресијата на болеста, да се избегне болничко лекување и терапија со кислород, односно што подолго да се продолжи квалитеот на живот на болниот.
