Дури и ако немаат кашлица или зголемена телесна температура, екстремната збунетост и делириумот се почести кај лицата постари од 65 години со кревко здравје, во споредба со нивните врсници во подобра физичка кондиција. Иако се уште не се јасни причините за тоа, студијата повикува на поголема свест во болниците и домовите за нега на стари лица.
Три главни симптоми на инфекција со новиот коронавирус се нова и континуирана кашлица, температура над 37,8 степени и промени во мирисот или вкусот.
Околу 85 проценти од луѓето ќе имаат барем еден од овие симптоми. Меѓутоа, истражувањата сугерираат дека одредени возрасни групи може да имаат и други симптоми, како пролив и повраќање кај децата.
Во ова истражување на Кралскиот колеџ во Лондон биле анализирани податоците на над 800 лица на возраст над 65 години, кои имале позитивен тест на новиот коронавирус. Истражувачите откриле дека хоспитализираните повозрасни лица кои се класифицирани како слаби, веројатно имале делириум како еден од симптомите, во споредба со лица на иста возраст кои не биле во таа категорија. Овој термин лекарите го користат за опишување на повозрасни лица кои тешко се опоравуваат од секојдневни болести.
