Губењето на осетот за мирис, кој понекогаш ги погаѓа заразените лица со новиот коронавирус, е единствен и поинаков од оној кога осетот за мирис ќе го изгубите по настинка или грип, велат европските научници кои ја проучувале оваа појава.
- Кога заболените од КОВИД-19 ќе го изгубат осетот за мирис, односно кога ќе добијат аносмија, тоа е изненадно и силно, и обично не е проследено со затнат нос или со течење на нос, бидејќи поголемиот процент од заразените можат нормално да дишат низ нос.
- Друга работа која ја разликува болеста КОВИД-19 од останатите слични болести е губењето на осетот за вкус.
Не се работи за благо пореметување на вкусот кое е последица на губењето на ова сетило, велат научниците во трудот објавен во списанието Rhinology. Заболените од КОВИД-19 кои го изгубиле осетот за вкус навистина не можат да разликуваат слатко од горчливо.
Стручњаците се сомневаат дека тоа се случува затоа што вирусот влијае на нервните клетки кои се директно вклучени во создавање на осетот за вкус и мирис. Секој, велат, тие, со овие симптоми треба да се самоизолира и да се тестира на коронавирус, а членовите на семејството исто така треба да бидат во самоизолација за да се спречи ширење на болеста.
Водачот на истражувачкиот тим, проф. Карл Филпот од Универзитетот East Anglia, спровел тестови за вкус и мирис на 30 волонтери: 10 со КОВИД-19, 10 со настинка и 10 здрави лица без никакви симптоми. Губењето на сетилото за мирис било поизразено кај заболените од КОВИД-19 кои не можеле да идентификуваат мириси, ниту да одредат дали нешто е слатко или е горчливо.
“Навистина постојат многу единствени показатели со помош на кои може да се разликува новиот коронавирус од останатие респираторни вируси. Тоа е возбудлива вест оти тоа значи дека сетилото за мирис и за вкус може да се користат за да се одреди дали некој боледува од КОВИД-19 или обична настинка или грип“, вели проф. Филпот.
