Утрата веќе стануваат свежи, децата се вратија во училиште, во околината мириса на дрва и пиперки – есента чука на врата. Иако времето се уште е летно и календарски есента не е пристигната, сепак имунитетот треба да се подготви за зима, а еве кои намирници ќе ни помогнат во тоа.
Тиква. Одлично се вклопува во десерти, но од неа може да се направат и солени чорби и варива. Полна е со хранливи материи кои ја јакнат одбраната на организмот од бактерии и вируси – витамин Ц, фолати, цинк, антиоксиданти, бета каротен, па дури и здрави омега-3 масни киселини.
Цимет. Оди со речиси секој чај, а може да се додаде и во кафе. Циметот е зачин кој грее, па со оглед на променливото време, може добро да се најде. Има антивирусни и антибактериски својства, а во традиционалната медицина се користи за ублажување на стомачни тегоби, стомачен грип, мачнини и упорни настинки.
Јаболка. Јаболката содржат низа состојки кои имаат антиинфламаторен и антиалергиски ефект. Јаболката се богати со кверцетин, супстанца која помага во функционирањето на дишните патишта и ги чисти од слузта.
Лути пиперки. Лутото е преовладувачки есенски вкус според традиционалната кинеска медицина и макробиотиката, така што консумирањето лути намирници во есен поволно делува на организмот во целина. Капсаицинот што го содржат пиперките ја раствора слузта, така што претставува одлична превенција од развој на настинка.
Батат (сладок компир). Се подготвува како и обичниот компир. Од обичниот компир, бататот се издвојува заради богатството на бета каротен и витаминот Ц, нутриенти кои делуваат превентивно против настинка и грип.
