Со оглед дека сите ткива и органи во телото имаат потреба од крв за правилно да функционираат, не е тешко да се разбере дека високиот крвен притисок е проблем кој со тек на времето, доколку не се дрѓи под контрола, влијае на здравјето на мозокот, бубрезите, очите, коските, па дури и половите органи.
Здравите животни навики и уредната терапија која го регулира притисокот се превенција за долгорочните проблеми кои ги зафаќаат сите витални органи во телото.
АРТЕРИИ
Се почнува во артериите. Здравите артерии кои непречено пренесуваат крв од срцето до остатокот од телото, имаат мазна и еластична облога на внатрешните ѕидови. Доволно се јаки и еластични да можат да спроведуваат крв во сите органи. Високиот крвен притисок ја менува ваквата слика. Дополнителниот притисок на крвта може да ги оштети клетките во внтарешните ѕидови на артериите. Доколку притисокот не попушти, доаѓа до пукнатини на облогите на ѕидовите, кои тогаш веќе нема да бидат мазни и ќе изгубат на еластичност.
На тие места се таложат масни наслаги (плак). Крвта не може слободно да се движи околу тие препреки што на карјот доведува до затнување. Ова оштетување може да предизвика ѕидовите на артериите да се растегнат и да се надујат ако балон, а тоа се нарекува анеуризма, која може да се отвори и да крвари.
СРЦЕ
Срцето е мускул и за правилно функционирање му е потребна крв. Доколку дотокот на крв во срцето е пореметен тоа може да предизвика:
-
Неправилност во отчукувањата (аритмија)
-
Болки во пределот на градите (ангина пекторис)
-
Срцев удар
За да проструи крв низ затнатите артерии срцето мора да работи оптоварување. Дополнителниот напор може да предизвика патолошко зголемување на срцето поради кое ѕидовите на срцевиот мускул губи сила и не може да пумпа толку крв колку е потребно. Ваквата состојба може да предизвика срцев удар или застој на срцето.
МОЗОК
Високиот крвен притисок е водечка причина за мозочен удар. Кога артеријата во мозокот пукне, почнува да попушта или да се затнува, може да стопира доаѓање на крвта во клетките на мозокот. Зависно од тоа кој дел од мозокот губи крв и која е неговата функција, последица може да биде проблем со говорот, видот, движењето или било што што мозокот контролира.
Ваквата состојба може да биде привремена доколку дотокот на крв се нормализира или штетата може да биде трајна ако клетките во мозокот изумрат. Намаленото обезбедување на крв во мозокот може да создаде и потешкотии со размислувањето и помнењето. Тоа може да предизвика состојба која се нарекува васкуларна деменција.
БУБРЕЗИ
Едно од пет лица со зголемен крвен притисок развива болести на бубрезите. Бубрезите се потпираат на мрежа од мали крвни садови преку кои примаат кислород и хранливи состојки и го филтрираат отпадот од телото. Кога крвните садови ќе се затнат, бубрезите не можат да ја извршуваат својата функција. Состојбата на бубрезите има влијание и на крвниот притисок. Болните бубрези може да предизвикаат хипертензија, што повторно предизвикува дополнителни проблеми со бубрезите и така се таложат проблемите. На крај може да доведе до затајување на бубрезите.
ОЧИ
Високиот притисок го попречува протокот на крв низ крвните садови што предизвикува оштетување на ситните садови во очите. Поради тоа, под ретината која е задолжена за оштрина на сликата, може да се насобере течност. Тоа предизвикува замаглување на видот, искривување на сликите и на крајот губење на видот.
ГЕНИТАЛИИ
Намалениот доток на крв во половите органи може да предизвика еректилна дисфункција кај мажите и намален сексуален нагон кај жените.
КОСКИ
Како последица на високиот крвен притисок во урината може да се појави вишок калциум. Телото ќе се обиде да се одбрани од тоа на начин што калциумот ќе го црпи од коските, а тоа води во остеопороза. Жените во повозрасниот период кои имаат зголемен притисок, се посклони кон проблеми со слаби и кршливи коски.
