Некои од најчестите се главоболка, проблеми со стомакот (дијареја, запек, нервозни црева), течење на носот, ненадејна кашлица, исеченици, изгореници и слични проблеми со кожата. Ваквите ситуации секогаш не „фаќаат“ неподготвени, па затоа мошне е важно дома да имате мини апрека, која содржи се што ви е потребно за веднаш да реагирате! За добра домашна аптека особено треба да водат сметка луѓето кои имаат некоја хронична болест или живеат со постари лица, болни луѓе и деца. Одвојте еден чист, сув агол во домот и во него сместете ја својата домашна аптека, која треба да го содржи следново:
Средства за дезинфекција на рани
Никогаш не се знае кога може да се исечете, изгребете или на некој друг начин да се повредите. Затоа е важно да имате средства за дезинфекција. Најдобар избор се јодот и хидрогенот.
Фластер, завој, стерилна газа
Откако ќе ја исчистите раната, треба да сте сигурни дека нема да биде изложена на прашина, нечистотија или други честички кои би можеле да предизвикаат инфекција. После дезинфекцијата почекајте течноста да се исуши, па раната заштитете ја со газа или завој, во зависност од големината. Ако е длабока и не може да го запрете крвавењето, веднаш појдете на лекар.
Алкохол
Тоа е течност која ја користиме за дезинфекција на речиси се – од кожа, накит, до најразлични предмети во домаќинството кои треба секогаш да бидат чисти. Затоа шишенце со алкохол е обавезно во секоја куќа.
Физиолошки раствор, игла, шприц
Се работи за прва помош со која се прави хидратација на организмот во болниците, а и дома, исто така, има одличен ефект. Со физиолошки раствор можете да го чистите лицето (но внимавајте тоа да не го правите пречесто), да го испирате носот, да ја ублажите иритацијата на окото. Ако дома имате мало бебе секогаш имајте физиолошки, (и игла и шприц) за да го „средите“ затнатото носе на малечкото. Иглата ќе ви служи за да ја боцнете во шишето со физиолошки (во горниот мек дел), а со шприцот извлечете од течноста.
Аналгетик
Во случај на главоболка, забоболка или болка во коските, би било одлично дома да имате апче против болка. Најдобро е во консултација со лекар да одредите што за вас би било добар избор. Некои аналгетици освен што ги отстрануваат болките и ја спуштаат температурата.
Маст, крема или гел за отоци, повреди и болки
Неретко овде – онде знае да не заболи, пече, отече… Овие производи овозможуваат инстант олеснување!
Маст или крема за изгореници
Мошне честа повреда во кујната, која е неопходно да се смири со соодветно средство. Доколку изгорениците се поголеми, црвенилото не попушта, а местото почнува многу да боли и дури се јавува температура неопходно е да побарате лекарска помош.
Пробиотик
Проблемите со стомакот се чести, па би требало дома секогаш да имате пробиотик, кој ќе помогне при запек, нервозен стомак и слични тегоби.
Препарати за искашлување
Еден од најиритирачките симптоми кој се јавува во овој период од годината доста често, секако, е кашлицата. Здодевен, но обавезен придружник на настинките и грипот што треба да се излекува што е можно поскоро за да се одбегнат посериозни последици, како воспаление на белите дробови и бронхитис. Консултирајте се со фармацевт или лекар што би било најдобро за вас – сируп, таблети или капки за инхалација.
Лекови за деца
Децата почесто се борат со здодевната кашлица од возрасните, па навреме обезбедете добар препарат за искашлување прилагоден на возраста, кој ќе им ги олесни тегобите и ќе им помогне што поскоро да го исфрлат шлајмот. На списокот детски лекови што треба да ги имате дома обавезно ставете и сируп за намалување на телесната температура. Се разбира, добро би било дома да имате и природни лекови – чаеви, а од „апаратите“ обавезен е топломерот. Не е лошо при рака да имате и апарат за мерење притисок, а ако е неопходно и шеќер. Исто така, личностите кои имаат некоја хронична болест секогаш дома треба да имаат од својот лек.
